Kva og kvifor måle di satsing på sosiale medier

Skulle du, på tross av alle mine advarslar, likevel velge å satse på sosiale medier som kanalar for dine interesser eller ditt firma, så lytt iallefall til desse velmeinte råd:

Som ein ropar i skogen får ein svar heiter det. Men kanskje får du ikkje det svaret du ynskjer eller kanskje får du ikkje svar i det heile. Ved å bruke ulike nettverkty kombinert med eigne refleksonar kan du langt på veg finne ut om du får svar og kva svar du får.

Buzzsumo er ei nettside som du absolutt ikkje treng å bry deg om. I utgangspunktet ei glimrande side der du kan søke fram ditt satsingsområde og få eit ryddig resultat som viser ei sortert liste med nettstader rangert ut frå kor mange delingar sida har på Google, Twitter, Linkedin og kor mange likes den har på Facebook. Det eg opplevde var at stort sett alle norske søkeord gav 0 match. Så her er nok kjeldematerialet alt for smalt til at programmet har nytteverdi. Som døme kan eg vise til at søk etter ordet "norge" den siste veka gav 10 lenketreff der fem av desse var til videoar levert av Adventistkyrkja i Bergen..

For skikkeleg å godgjere dei som har forvilla seg inn på sida di, kan du sørge for at eit popupvindauga sprett rett i fleisen på vedkomande når ho forlet sida di. Der kan du be vedkomande ryke og reise eller du kan oppmode ho om å registrere seg for å få meir informasjon. Nettsida Optionmonster viser veg om korleis dette skal gjerast. Dette gjer susen og du har sikra deg denne brukaren for evig og alltid :). Når me først er inne på den tekniske biten så bør du også vurdere å legge inn kode slik at sida di automatisk vert lasta på ny viss vedkomande prøver å lukke sida for godt.

Uff! Eg skulle jo kome med noko matnyttig. Men faktisk så er dei to tipsa eg no har referert dei to første tipsa i det eg trudde var seriøse tips til analysering av satsing på sosiale medier. Jf pkt 2 i mitt forrige blogginnlegg.

Så fant eg endeleg ei side som kanskje kjem med noko matnyttig når det gjeld analyse av some. Nettsida twtrland.com viser deg faktisk litt relatert info om bruk og nettverk i Twitter, Facebook og Instagram. Her kan ein søke fram kven det skulle vere og få fram statistikk på vedkomande sin aktivitet innan mediet. Her viser eg vår statsminister sin facebook- og twitterkonto.

Avslutningsvis vil eg sei at proffe analyseverktøy ala Google Analytics også gjer ein god jobb innan analysering av sosisale medier. Det er til sjuande og sist du som tolkar resultata som avgjer kor bra analysen skal bli.

Webressursar for måling av sosiale medier

ADVARSEL!
Sidene under pkt 1 og 2 har bra innhald men dårleg kultur. Sida opnar seg på ny når du prøver å lukke den.

---

Oppgåveteksten er å finne tre webressursar der ein kan analysere aktiviteten på sosiale medier OG dette skulle søkast fram via anten Linkeldn, Twitter eller RSS. Eg brukte Twitter og fant:

1. 7 Multi-Plattform Social Media Analytic Tools
   
   
2. Social Media Tips: 51 Irresistible Social Media Tool and Technology Tips
   
   
3. Lessons In Social Media Analytics [Infographic]
   

Google analytics - analyseverkty av nettpubliseringar

Alle som har publikasjonar på nett ynskjer attendemelding på publiseringa. I tidlegare innlegg har me fokusert på brukarane sin respons via kommentarar anten direkte knytt til publikasjonen eller via ulike sosiale medier. I denne bloggen skal eg ta for meg eit verkty som analyserer nettbruken på gitte sider.

På nettsida https://www.google.com/analytics/ kan du registrere deg som brukar av statistikkverktyet Google analytics og legge inn nettsider du ynskjer å overvåke. Når du legg inn ei nettside vert det generert eit script som du kan legge inn i kjeldekoden til nettsida di. Når dette er gjort vil kontoen din på Google analytics presentere eit uttal av statistikkar basert på brukarane sin trafikk, geografi, nettverkty m.m.

Eg har valgt å legge inn fire av sidene eg administrerer. På startsida på min konto vil eg då få oversikt over den unike nettrafikken på alle sidene i den tidsperioden eg har valgt. Startsida viser også kor lang tid i snitt kvar brukar har brukt på sidene. Google analytics tilbyr deg som brukar kontroll på kva du ynskjer skal bli vist på dine kontosider. Programmet er ekstremt fleksibelt og gjer deg god kontroll, men det tar litt tid å setje seg inn i all funksjonaliteten.

For meg som nettredaktør så er eg interessert i å vite:

1. Kor mange brukarar som har frekventert sida mi innan ein tidsperiode
2. Kor mange av desse brukarane er gjengangarar
3. Kva sider har dei vitja
4. Når på døgeret og kva vekedag har dei vitja meg
5. Kvar kjem mine brukarar frå
6. Kva søker dei etter på mine sider
7. Kor lang tid brukar dei på
   1. kvar side
   2. heile sesjonen
8. Kva medium brukar dei
9. Kva sider kom dei inn til mi side frå
10. Kva sider reiste dei til når dei forlot sida mi

Dei fleste av desse spørsmåla får eg svar på via analytics. Eit av spørsmåla eg stilte var jo kva dagar og til kva tider brukarane er på sidene. Eg ynskte også vite kor mange brukarar som er innom og kor mange som er gjengangarar. Illustrasjonane under viser desse opplysningane for først sundag 24. november og så måndag 25. november:

---

Ut frå desse opplysningane kan eg kjapt konkludere med at døgnfordelinga av brukarmassen er omlag lik både sundag og måndag sjølv om ein sundag har flest brukarar kl 20 medan ein måndag har dei fleste innom kl 17. Trafikken er meir enn det doble måndag i høve sundag. Eg ser også at det er mange fleire gjengangarar på sidene måndag enn sundag.

Desse opplysningane samsvarar godt med dei eg har frå det verktyet eg brukar til vanleg; Awstats. I og med at eg kjenner godt til Awstats sin presentasjonsform så trivest eg betre med den, men eg trur nok at Google Analytics gjer ein like god rapport. Kanskje kan eg bruke begge og la dei utfylle kvarandre? Awstats har samla all informasjonen på ei presentasjonsside medan Analytics er meir fleksibel med at ein gjer deg høve til å sy din eigen rapport.

Men uansett val av verktyleverandør - eit slikt verkty er særs viktig for å gje deg som leverandør av nettenester kontroll over korleis brukarane oppfører seg og dermed moglegheit til å justere di satsing ut frå brukarane sine behov og ynskjer.

RSS - kjapt, tilpassa og effektivt

Som nettredaktør og webutviklar har eg nytta meg av RSS eller newsfeeds i mange år. Å kunne hente inn feeds frå ei temaside direkte inn på firmaet si webside eller intranett forenklar arbeidet til nettredaktøren / nettjournalistane. Alternativet ville vore å søke desse fram sjølv og så legge dei ut på nettsidene. Etter kvart har det utvikla seg gode RSS-lesarar slik at alle kan lage sine eigne søk og få desse presentert lokalt hjå seg sjølv. Det fine med det er du no kan lage di eiga nyhendeside der alt du har interesse av å vite om vert lagt inn på ei tilpassa visningsside for deg.

Negative eller positive kommentarar?

Oppgåveteksten seier noko om å vurdere det å kommentere blogginnlegg på twitter kontra i den opphavelege bloggen. Eg vel å vise til mine oppfatningar av kommentarkulturen generelt for å illustrere kva arena ein bør kommentere på og kanskje korleis ein bør kommentere.

Ser ein på kommentarar på ulike #SoMe-plattformar vil ein oppdage særs ulik kommentarkultur. På nettavisene sine kommentarfelt (jaudå - det er også sosiale medier) er 90% av kommentarane kritiske og negativt lada - spesielt innan sport. Kanskje derav namnet sportsidiot... :).

Når det gjeld kommentarar på twitter så har mange av desse også negative forteikn, men berre ein brøkdel i forhold til nettaviser. Sidan twitter er nettverksorientert i motsetning til nettaviser så vert mange av kommentarane på twitter relatert frå grupper til grupper. Meir som sladrekroken på kafeen - har du høyrt at.. Dei positive twitterkommentarane er ofte knytt opp mot noko representantar innan di gruppe har gjort, som til dømes når me kommenterer kvarandre sine bloggar som ei pålagt oppgåve i dette studiet. Det er ikkje mange av oss som legg inn syrlige kommentarar til våre medstudentar :)

Så har me to lune kommentararenaer; FB og Blogg. På Facebook får du berre gode kommentarar om kor flink, fin, god og snill du er. Bloggkommentarar krev derimot litt meir av den som kommenterer - det er liksom ikkje det store å få ein kommentar med tre hjarter og pluss for at du har brukt x antal teikn i bloggen. Det er sjølvsagt mange andre some-arenaer eg kunne tatt med - td YouTube, men det får bli ved eit seinare høve (denne skulle jo vere kort).

Fata morgana

Ordspel er kjedelege og treff sjeldan godt. Problemet med ordspel er som oftast at avsendar undervurderer mottakar og difor forklarar kva meininga med bruken er eller at ordspelet er så platt at det høyrer heime i småskulen.

Denne gongen skal eg prøve å vinkle innlegget mitt positivt og verkeleg dra fram gode døme på korleis ein kan nytte Facebook som marknadsføringsarena - trur eg...

Først ynskjer eg å dra fram ein liten godbit som viser at det faktisk er mogeleg å kome seg ut i den store verda via FB. FeelGood Store på Finnsnes (seier seg sjølv at den klesbutikken ligg der) har hatt suksess på FB. Faktisk har dei via sosiale medier skaffa seg kundar både i Oslo og Porsgrunn! Ikkje så mange, men likevel...

Så var det oppskrifta på det gode liv som Britt og Ceila her har funne ut av. Under her har eg kopiert/redigert/laga ei 8-punkts liste som kanskje kan hjelpe deg på vegen:

1. Opprett ei informativ og attraktiv FB-side
Hadde me stoppa ved første delen, så kunne jo dette punktet vore overkomeleg. Me kunne ha informert om opningstidene, om kven som arbeider hjå oss, om produkt og prisar og kanskje til og med litt kontaktinformasjon i tilfelle einkvan ynskjer å ta kontakt med oss utanom sosiale medier. Men så var det dette med attraktivitet då. Ho mor er stadig innom mi FB-side, men eg trur ikkje det er fordi sida mi er så attraktiv. Viss eg skal få andre sine mødre inn på sida så må eg nok ta nokre grep. Har eg kompetanse til å gjere sida attraktiv? Kva skal til for å få den attraktiv? Så allereie her under delpunkt 1 byrjar kronene å rulle. Eg må leige eit konsulentfirma som skal analysere kva som er kriteria for å få sida attraktiv og så må eg sikkert hyre inn eit designfirma som visualiserer det konsulentfrmaet har kome fram til.

2. Finn målgruppa di
Her kjem ho mor inn! Dette punktet kan eg kanskje ordne sjølv, eller? Kva viss eg veit at eldre damer er mi målgruppe - kva gjer eg så? Stiller opp med flyers og stands på møter i saniteten eller annonserer på Facebook med Facebook Ads?

3. Relevant og verdifull informasjon
Når du har funne målgruppa di må du vise at det du har å kome med er relevant for målgruppa. Her er det også ein del fallgruber. Viss du har produkt som målgruppa siklar etter så hadde du truleg ikkje hatt trong for ei FB-side for å marknadsføre produktet. Dermed balanserer du på ein knivsegg når du no skal fronte ditt produkt for målguppa di og likevel framstå som truverdig. Reine salslenker til din nettbutikk vil bli sett på som rein spam. Fokuser heller på å forklare kundane kvifor dei skal kjøpe dine produkt eller tenester. Som sagt litt vrient ut frå truverde, men stå på.

4. Deling
Det ligg nedarva hjå oss å dele. Me er eit folk av deling. Frå urtida så har me delt det me har mellom oss - etter kvart helst det me ikkje ynskjer sjølve, men likevel. Her er det mykje å hente i sosiale medier - akkurat fordi ein kan dele utan at ein ofrar noko sjølv. Skulle det vere nokre utrivlege sjeler som absolutt ikkje vil dele, så kan du legge inn ekstra pådrivarar for deling via konkurransar på sida. Sørg for at både dine nettsider og alle dine sosiale medie-sider er pepra med delingsknappar. Bladet frå Finnsnes kunne med fordel ha tripla rekka med delingsbrytarar.

5. Hallo! Nokon heime?
Det er ingen vits i å etablere seg på Facebook viss ikkje verksemda er til stades og tilgjengeleg for kundar og lesarar. Invester gjerne i ekstra skjerm i sentralbordet slik at resepsjonisten kan utnytte dødtida til å svare på alle spørsmåla som måtte kome, det vere seg produktklagar, kjeft, skryt, delingar, eller hjarterekker. Det er ikkje sikkert at du treng å vere pålogga 24 timer i døgeret for å sjå om det er kome innlegg/spørsmål, men viss du klarar det så vil det betale seg - iallefall på timesetelen. Viss ikkje så hugs at den mest aktive tida på FB er mellom kl 18 og 20 - då må du iallefall vere på plass, for det er ikkje god FB-kutyme å kommentere innlegg som er eldre enn 8 timar.

6. Relasjonsbygging
For tredje gong er ho mor på plass! Ein treng støttespelarar for å oppnå suksess på Facebook. Bygg relasjonar med andre innan din bransje, men styr unna direkte konkurrerande verksemder vel og merke viss ikkje du trur at du har eit betre tilbod enn dei. Aktuelle relasjonsarenaer kan vere fagblad (i mitt tilfelle Pensjonisten og KK), foreninger (Saniteten etc.), organisasjonar og nettsider som skriv om bransjen generelt. Lag ferdige artiklar og send desse ut som pressemeldingar. Journalistar har det like travelt som oss andre, så ferdige artiklar for trykk er ei gudegåve til bransjen. Her kan det kome nokre kostnader med innleige av tekstforfattar og fotograf, men truleg vil det betale seg.

7. Kommunikasjon
Bruk eit direkte, laust og ledig språk, kall ein spade for ein spade og svigermor for akkurat det. Legg på hjarterekker og smilefjes for å vise emosjon. Svar alltid på spørsmål og innlegg som krev svar, men hugs FB-kutymen om kommentarar på gamle innlegg (8-timars regelen). Ikkje slett konstruktiv kritikk - hrmm.. kva konstruktiv kritikk er får du sjølv vurdere.

8. Regelverk
Les Facebook sine retningsliner, og set deg inn i kva reglar som gjeld for marknadsføring på Facebook. Bygg strategiar etter kva som er lov, og ikkje lanser di Facebookside eller kampanje før du er sikker på at den følgjer Facebook sine retningsliner. Kontakt gjerne fagfolk på førehand, slik at du er sikker på at sida di følgjer reglane, men hugs at også advokatar og rådgjevarar (SoMe-ekspertar - mooaahahahaha... :) skal ha til salt i grauten.

---

Til slutt vil eg sende ein stor takk til Sigve som mi liste har tatt utgangspunkt i og henta idear frå. Håpar du ber over med at eg har tatt meg til rettes.

Så var det på'an igjen..

Eg var så pumpa og dritlei alt som heiter sosiale medier som eg nokon gong har vore etter fullføring av oppgåve 2 (eg trur iallefall at eg har gjort oppgåve 2). No føler eg meg klar igjen til å ta fatt på det vidare arbeidet med faget sosial medier. Problemet mitt, eller kanskje det heller er ein force, er at eg ikkje har sansen og heller ikkje trua på sosiale medier som fornuftige kanalar. Eg trur at i den forma det no er, så vert det ein flopp for firma som kastar seg ut i denne formen for marknadsføring. For meg så virkar iallefall både twitter og facebook som spam-kanalar; eg får like mykje drit inn på dei kanalane som eg får på eposten (sjekk skjermdumpen til høgre).

Heldigvis er oppgåva no å skrive eit bra blogginnlegg - og det er eg ubeskjeden nok til å sei at eg kan. Det hadde vore verre viss det vart krevd å skrive eit blogginnlegg om kor bra sosiale medier er som marknadsføringskanalar. Men det er altså ikkje oppgåva. Ja, kva søren var oppgåveteksten igjen; "Forstå mekanismene i nettverksbygging med Twitter" - det var det, ja.

Hmmm... forstå nettverksbygging i twitter? Eg har i meir enn ein månad fulgt dei fleste av some-ekspertane som faglærar viser til i oppgåveteksten. Mine røynsler er at dei har danna ein intern klikk som hyper kvarandre om kor bra og kor viktig det er å vere aktiv på SoMe og då særskilt på twitter. Sjargongen viser også at dei fleste av desse ikkje ser på seg sjølv som ein hvermannsen - trur nok ikkje dei har løfta seg heilt opp til Han der oppe, men dei ser iallefall ikkje på seg sjølve som ein del av ålmenta :). Sidan min blogg er særs kritisk til SoMe-kanalar og spesielt dei såkalla SoMe-ekspertane, så slit eg litt med å dra fram døme frå mitt persongalleri - det ville vere særs ufint å gjere det.

Kva med nettverksbygginga?
Oh shit! Det var jo det som var spørsmålet. Sånn generelt så trur eg at nettverksbygginga på Twitter fungerer omlag på same måten som på Facebook. Viss du er ven med meg så er eg ven med deg.

Eg kan ikkje sjå nokon annan grunn til at KjellTech skulle følgje meg på Twitter enn at eg allereie følgjer han (litt stolt av den :). Og det er neste stikkord - mange av dei eg har snoka rundt er stolte av at dei har fått den og den som følgjarar. Difor vil ein gjerne følgje personar ein ser opp til - ikkje berre for å sjå om vedkomande har noko fornuftig å kome med, men også for kanskje å få vedkomande på si eiga followliste. Ein tredje faktor som dreg folk er interessefelt. Driv ein med pistolskyting så vil ein naturleg nok fylgje med andre aktørar innan same idretten.

Kva så med firma som kastar seg inn på twitter-arenaen eller på facebook. Kvifor skal eg ha interesse av dei? Det har du heller ikkje, difor må det godteposar til for å vekke interessa di. Du må få noko igjen for at du skal halde ut med SAS-reklame på din twitterkonto. Og desse godteposane eksisterer - firma som har suksess på SoMe brukar kanalane til å marknadsføre tilbod, konkurransar og god gamaldags gossip.

Då var det gjort! På ny har eg dradd både deg og meg djupt ned i dei svartaste SoMe-tankane. Og det kjem eg nok til å gjere igjen og igjen og igjen - viss du gidd å henge med.